الخطيب = هلو حبيبتي
الخطيبة = هلو .. شو نسيان انو الك خطيبة؟
الخطيب = لا والله ... كيف بدي انسى ونحن النا 7 سنين مخطوبين؟
الخطيبة = لسه ماقررت ايمتى بدنا نتزوج؟
الخطيب = لكن ليش اتصلت فيكي ؟ حتى نحدد موعد العرس
الخطيبة = لكن خليها الخميس الجاي كتب الكتاب والعرس بنفس اليوم
الخطيب = لأ .. ما منلحق .. منعمل العرس الخميس ، وانشاء الله بعد أسبوعين منروح للمحكمه ومنكتب الكتاب
الخطيبة = أو بلا .. ليش العجلة؟ منعمل العرس الخميس ومنخلي كتب الكتاب لبعد مايصير عنا ولد .. منروح منكتب الكتاب ومنسجل الولد بنفس الوقت مشان مانضل رايحيين جايين
الخطيب = والله فكره حلوة ، بس شلون بدنا نجيب الولد
الخطيبة = شو بعرفني؟؟ أحسن شي اسأل بابا .....
بس بظن هو بيجي لحاله لأنه ماما بتقلي الأولاد رزقة من عند الله
يعني نحن مالنا علاقة بالموضوع
الخطيب = اووووووووووووووه .. طمنتيني
بس بخاف الله يرزقنا من أوسع أبوابه ويبعتلنا شي ستة أو سبعة
الخطيبة = لا لا لا ... أنا رشيقة وبطني ما بتحمل أكتر من واحد
الخطيب = ليش هو بالبطن؟؟
الخطيبة = أي بالبطن جنب المعدة .. و لازم كل أسبوع اروح اشوفه عالكمبيوتر ، بس خايفة يطلع مو حلو
الخطيب = مو مشكله اذا مو حلو منفرمت الكمبيوتر
الخطيبة = والله فكره ، لكن أنا ليش قبلت فيك؟ لأنه انت اذكى مني بشوي
الخطيب = لكن .. أنا بعجبك لما بفكر .. ولو إني أحياناً بتعب من التفكير
الخطيبة = وأنا كمان أحياناً بيغمى علي من كتر التفكير
الخطيب = قبل شوي اتصل فيني النجار وسألني عن غرفة النوم
كيف بتحبيها ؟ مزدوجة لشخصين ؟ والا منفصلة (بسريرين) ؟؟
الخطيبة = لا لا .. منفصلة أحسن لأنه أنا من أول مابنام أحلامي كلها جمباز وملاكمة وما بدي تجيك ضربة وازعجك وانت نايم
الخطيب = شكرا حبيبتي هلأ عرفت أديش انتي بتحبيني
الخطيبة = حبيبي وما بدنا نتأخر بحفلة العرس ، لازم نرجع بكير لحتى نظف البيت وجهزلك الأكل
الخطيب = أوكي حبيبيتي
الخطيبة = منروح للحفلة ومنشوف المعازيم .. وبعدين يزفّونا
انت بزفّوك للفندق مشان تقضي شهر العسل على راحتك
وانا بزفّوني لبيتنا وبنتظرك بالبيت
وبعد شهر بتجي ان شاء الله وبتلاقي الغدا جاهز
الخطيب = والله عندك أفكار عظيمه .. الحمدلله ، الله عطاني خطيبة جمال وذكاء ..!!
الخطيبة = شو هاد غزل؟
الخطيب = العفو .. شو يعني غزل؟
الخطيبة = غزل: يعني صوف وخيوط !!
المهم انت اليوم وين رحت؟
الخطيب= رحت ع الملعب .. وحضرت مباراة بين الاتحاد والكرامة
الخطيبة = أكيد اتسليت
الخطيب = لا والله .. طلعت المباراة إعادة من السنة الماضية
الخطيبة = و شلون ؟؟؟
الخطيب = نفس الملابس ، ونفس الحكم لابس اسود ، والطابه نفسها مدعبلة ولونها ابيض
الخطيبة = كان لازم تتأكد قبل ما تفوت الملعب
الخطيب = اي والله .. فاتتني هالشغلة .. لأني اليوم أنا مطفي
الخطيبة = خير .. انشا الله مافي شي؟
الخطيب = لا مافي شي بس الحجي والحجه صرلن فترة متقاتلين
الخطيبة = له له له .. ليش؟
الخطيب = ما بعرف صرلن أسبوعين بغرفتهن وقافلين الباب، ولهلأ ماطلعوا
الخطيبة = بكونوا نايمين
الخطيب = لا .. بكونوا لسه عم يحلوا المشكلة
الخطيبة = أي مشكلة؟
الخطيب = ما بعرف ..ما فهمت .. من أسبوعين سمعت الحجي عم يقول للحجه: أنا خايف أموت لذلك بدي اعترفلك بخيانتي الزوجية
أناكنت عم خونك ، وكنت كل ما اخون بحط حباية فاصوليه بالمزهرية
جاب المزهرية طلعوا 3 حبايات فاصوليه
وبعدين الحجه صارت تبكي وقالت: وانا كمان خنتك ، وكنت كل ما اخونك بحط حباية عدس بالمزهرية، وجابتله المزهرية وطلعوا حوالي كمشة إيد
بس قالت مشان الحلال والحرام انها طبخت منن ست مرات شوربة برمضان.
وهون عصّب الحجي كتير _ مابعرف ليش _ وصرت اسمع صوت ضرب
الخطيبة = ليكون مابحب شوربة العدس؟
الخطيب = يمكن ..بس شو يعني خيانة زوجية؟
الخطيبة = يعني مثلاً الحجه تقول للحجي انها رايحه لعند الخياطه لتخيط تنورة وهي كذابة تروح عالسوق وتشتري جاهز وبتعرف الجاهز أغلى من التفصيل..!!
الخطيب = ايوا ... مو بكره تعملي معي خيانة زوجية .. صرت بعرفها
أصلاً كل مابدك تروحي عالخياطة بدي اروح معك
الخطيبة = أمرك .. وأنا وين مارحت باخدك معي
الخطيب = أصيله .. الله يساعدني و أسعدك
الخطيبة = أنا رح سكّر التلفون .. بس لا تنسى تخبّر أهلك عن موعد العرس
الخطيب = هلأ رح ضل دق الباب لحتى يفتحولي و راضيهن مع بعض مشان يحضروا عرسنا ..
الخطيبة = بلا هلأ بكونوا ناموا خليها للصبح
وانت كمان نام بسرعة ولا تفكر بشي
الخطيب = بحاول ... بس مو بإيدي بحب فكر .
وما زال التفكير مستمراً...بانتظار استيقاظ الحجي والحجه
موضوع: مكالمة مخطوبين.. 
السبت ديسمبر 04, 2010 3:22 am
